PILEULEUYAN ANAKING ANAK BAPA
Keur meujeuh sekar gumbira, suka bungah wawanohan. Beuki layeut beuki geugeut, pameunteu anu marahmay kiwari kedah paturay. Baeu hidep anak Bapa, anak Ibu. Sakedapan Bapa asmaning Dewan Guru sadaya SMP Satu Atap 4 Culamega seja nyimpaykeun rasa kanyaah, seja nyangreudkeun tawis katineung. Saméméh hidep undur tina lahunan, saméméh ingkah tina kanyaah, saméméh lésot tina pangkonan aya saeutik amanat pikeun nganteur ludeung kanu rék ngambah sagara kahirupan, ka anu rék ngadayung labuh pamaksudan. Sanajan haté Bapa kalih Ibu sadaya ngarasa beurat ngalésotkeun tali kasono, ngaguarkeun rasa kanyaah. Sabab wangkit kiwari hidep sadaya geus dianggap bagéan tina hirup Bapa kalih Ibu. Asa kamari urang babarengan, asa kamari urang sukan-sukan ngabudalkeun rasa kahéman, ngagolontorkeun rasa kasono.